: دین اسلام میں رسول اللہ صلی اللہ علیہ وسلم کی محبت کی کیا اہمیت ہے، وضاحت کیجئے۔
انسانی محبت کے بلند ترین درجات میں اللہ کی محبت کے بعد رسول اللہ صلی اللہ علیہ وسلم کی محبت ہے۔ اللہ کی محبت اور رسول اللہ صلی اللہ علیہ وآلہٖ وسلم کی محبت دونوں مل کر انسانی محبت کا سب سے بلند مقام تعمیر کرتی ہیں اور محبت کا سب سے پاکیزہ صاف شفاف اور روحانی درجہ تشکیل کرتی ہیں۔ رسول اللہ صلی اللہ علیہ وسلم کی محبت ہر مسلمان پر واجب ہے کیونکہ اللہ تعالی نے ہم سب کو اپنی محبت کا حکم دیا ہے اور اپنی محبت کے ساتھ رسول اکرم صلی اللہ علیہ وسلم کی محبت کو بھی شامل کر دیا ہے۔
چنانچہ رسول اللہ صلی اللہ علیہ وآلہٖ وسلم نے ارشاد فرمایا: تم میں سے کوئی شخص اس وقت تک مومن نہیں ہو سکتا جب تک کہ میں اس کے آبا و اجداد اور اس کی اولاد اور تمام لوگوں سے بڑھ کر اس کے نزدیک محبوب نہ ہو جاؤں۔ (سنن ترمذی)
اسی طرح رسول اللہ صلی اللہ علیہ وآلہٖ وسلم نے ہم کو اپنی محبت اور اپنے اہل بیت کی محبت کا بھی حکم فرمایا۔ رسول اللہ صلی اللہ علیہ وآلہٖ وسلم نے ارشاد فرمایا: اللہ سے محبت کرو کیونکہ وہ اپنی نعمتوں کے ذریعے تم کو غذا پہنچاتا ہے اور اللہ کی محبت کی وجہ سے مجھ سے بھی محبت کرو اور مجھ سے محبت کی وجہ سے میرے اہل بیت سے محبت کرو۔(ترمذی)
کسی بھی اسلامی معاشرے میں ایمان بنیادی حیثیت رکھتا ہے۔ جب بھی معاشرہ زوال پزیر ہوتا ہے تو اس میں اخلاقی کمزوریوں کے ساتھ ایمانی کمزوریاں اور خرابیاں بھی آہستہ آہستہ ان کے عقائد میں شامل ہو جاتی ہیں اور ایسا شخص ایمان کے ختم ہو جانے کے باوجود سمجھتا ہے کہ میرا ایمان اور عقیدہ درست ہے۔ ایمان کی عقیدے کی درستگی کے لیے اللہ تعالی نے تقریبا سوا لاکھ انبیاء کرام کو بھیجا اور اب چونکہ کوئی نبی قیامت تک کے لیے نہیں آئے گا۔ اس لیے آپ صلی اللہ علیہ وآلہٖ وسلم سے محبت کر کے اور ان کی اطاعت کر کے ہی ایمان کو درست اور باقی رکھا جا سکتا ہے۔
کی طرح اخلاقیات کو بھی مذہب میں بنیادی حیثیت حاصل ہے۔ دنیا والوں نے اخلاقیات کے جو معیار اپنے اپنے ممالک میں مقرر کیے ہیں۔ ضروری نہیں ہے کہ وہ سب اسلام کے نظام اخلاق کی کسوٹی پر پورا اترتے ہوں۔ معاشرتی اخلاقی برائیوں کے خاتمے کے لیے اور لوگوں کی اصلاح کے لیے اللہ تعالی نے صدیوں تک انبیاء کرام کو بھیجا اور پھر آخری نبی خاتم النبیین کو اس کام کی تکمیل کے لیے بھیجا اور اب آپ صلی اللہ علیہ وآلہٖ وسلم کے اخلاق کریمانہ اور اسوہ حسنہ پر عمل پیرا ہوکر اور آپ صلی اللہ علیہ وآلہٖ وسلم سے محبت کر کے ہی اخلاقیات کا اعلی نمونہ حاصل کیا جا سکتا ہے۔