عقیدہ رسالت

انسانی محبت کے بلند ترین درجات میں اللہ کی محبت کے بعد رسول اللہ صلی اللہ علیہ وآلہٖ وسلم کی محبت ہے ۔ اللہ کی محبت اور رسول اللہ صلی اللہ علیہ وآلہٖ وسلم کی محبت دونوں مل کر انسانی محبت کا سب سے بلند مقام تعمیر کرتی ہے اور محبت کا سب سے پاکیزہ صاف شفاف اور روحانی درجہ تشکیل دیتی ہیں۔ رسول اللہ صلی اللہ علیہ وآلہٖ وسلم کی محبت ہر مسلمان پر واجب ہے کیونکہ اللہ تعالی نے ہم سب کو اپنی محبت کا حکم دیا ہے اور اپنی محبت کے ساتھ ساتھ رسول اکرم صلی اللہ علیہ وآلہٖ وسلم کی محبت کو بھی شامل کر دیا ہے چنانچہ حضور اکرم صلی اللہ علیہ وآلہٖ وسلم نے ارشاد فرمایا: تم میں سے کوئی شخص اس وقت تک مومن نہیں ہو سکتا جب تک کہ میں اس کے آبا ءو اجداد اور اس کی اولاد اور تمام لوگوں سے بڑھ کر اس کے نزدیک محبوب نہ ہو جاؤں۔  (الحدیث)

اسی طرح رسول اللہ صلی اللہ علیہ وآلہٖ وسلم نے ہم کو اپنی محبت اور اپنے اہل خانہ سے محبت کا بھی حکم فرمایا۔ رسول اللہ صلی اللہ علیہ وآلہٖ وسلم نے ارشاد فرمایا:  اللہ سے محبت کرو کیونکہ وہ اپنی نعمتوں کے ذریعے تم کو غذا پہنچاتا ہے اور اللہ کی محبت کی وجہ سے مجھ سے بھی محبت کرو اور مجھ سے محبت کی وجہ سے میرے اہل بیت سے محبت کرو۔ ( ترمذی)