خودداری: توحید پر یقین رکھنے والا شخص خوددار اور بے نیاز ہو جاتا ہے اور اسے یقین ہو جاتا ہے کہ قدرت رکھنے والا اللہ ہے ۔ باقی سب میرے جیسے انسان ہیں، ضعیف کمزور اور بے بس ۔ اس لیے اس کا سر صرف اللہ کے سامنے جھکتا ہے۔

      انکساری: عقیدہ توحید سے تواضع اور انکسار پیدا ہوتا ہے کیونکہ توحید پر یقین رکھنے والا جانتا ہے کہ وہ اللہ کے سامنے بے بس ہے۔ اس کے پاس جو کچھ ہے سب اسی کا دیا ہوا ہے ۔ اللہ تعالی دینے پر قادر ہے ، وہ چھین لینے پر بھی قادر ہے۔

       وسعتِ نظر: عقیدہ توحید کا قائل تنگ نظر اور تنگ دل نہیں ہوتا کیونکہ وہ اس رحمان و رحیم پر ایمان رکھتا ہے جو کائنات کی ہر چیز کا خالق اور سب جہانوں کا پالنے والا ہے۔

     استقامت اور بہادری:  اللہ تعالی پر ایمان لانے سے استقامت اور بہادری پیدا ہوتی ہے۔ مومن جانتا ہے کہ ہر چیز اللہ تعالی کی مخلوق اور محتاج ہے۔ اللہ تعالی ہی کو سب قدرت حاصل ہے لہذا اس کے سامنے جھکنا چاہیے اور اسی سے ڈرنا چاہیے۔

    رجائیت اور اطمینان قلب:  عقیدہ توحید کا ماننے والا مایوس اور نا امید نہیں ہوتا۔ وہ ہر وقت باری تعالی کی رحمت پر  آس لگائے رکھتا ہے۔ کیونکہ وہ جانتا ہے کہ اللہ تعالی اس کی شہ رگ سے بھی زیادہ قریب ہے ۔وہ بڑا رحیم و کریم ہے،  وہ تمام خزانوں کا مالک ہے اور اس کا فضل و کرم بے حدوحساب ہے۔

      تقویٰ و پرہیزگاری:  عقیدۂ توحید سے انسان کے دل میں پرہیزگاری پیدا ہوتی ہے کیونکہ ہر مومن کا ایمان ہے کہ اللہ تعالی تمام ظاہر و پوشیدہ باتوں کو جاننے والا ہے۔ اگر بندہ پوشیدگی میں کوئی جرم کر لے تو ممکن ہے کہ وہ لوگوں کی نگاہوں سے چھپ جائے مگر اپنے اللہ کی نظر سے نہیں چھپ سکتا کیونکہ وہ تو دلوں کے ارادوں کو بھی جانتا ہے۔