سیرت طیبہ

بعثت نبوی صلی اللہ علیہ وسلم سے قبل عرب کے مذہبی حالات بھی انتہائی خراب تھے۔ کسی زمانے میں ان عرب کے لوگوں کا مذہب دین ابراہیمی تھا لیکن جب ان کی مذہبی حالت خراب ہو گئی اور نیک لوگ تلاش کرنے سے بھی نہ ملے تو انہوں نے  اپنے نیک آباء و اجداد کے بُت بنا لیے، اچھے زمانے کی یاد دہانی کے لیے ان کو یاد کیا کرتے لیکن ان کے بعد آنے والی نسلوں نے ان کی پوجا شروع کر دی جس سے ان کے اندر بت پرستی نے جنم لیا اور وہ بتوں کے سامنے جھکنے اور اپنی مرادیں مانگنے لگے،ان پتھروں کے بے جان بتوں کو خدائی اوصاف کا مالک سمجھنے لگے۔ اس کے علاوہ ان کے اندر کچھ اور مذاہب بھی تھے مثلا یہودی، عیسائی، آتش پرست، دہریے وغیرہ۔ یہودی مذہب کے لوگ جو کہنے کو حضرت موسیٰ علیہ السلام کے پیروکار تھے مگر ان میں دین موسوی کی کوئی بات باقی نہ رہی تھی،اسی طرح عیسائی مذہب کے لوگ جو خود کو عیسیٰ علیہ السلام کا پیروکار کہتے اور ساتھ ہی عیسیٰ علیہ السلام کو خدا کا بیٹا بھی تصور کرتے ، اس طرح وہ شرک جیسی برائی کا شکار ہو گئے۔ دہریے بھی عرب کے اندر موجود تھے جن کا ماننا تھا کہ اس کائنات کا کوئی رب نہیں ہے اور وہ کسی بھی مذہب کی پیروی نہ کرتے۔ اس کے علاوہ مجوسی یعنی آگ کی پوجا کرنے والے بھی عرب میں موجود تھے۔غرض بعثت نبوی سے قبل عرب کے لوگ مذہبی اعتبار سے بہت گمراہی کا شکار تھے۔