قرآن مجید

عام حالات میں جہاد فرض کفایہ ہے لیکن جب حکومت اعلان عام کر دے تو پھر جہاد تمام مسلمانوں کے لیے فرض عین ہو جاتا ہے۔ جب جہاد فرض عین ہو جائے، اس وقت جہاد کے لیے  نہ نکلنا اللہ کے عذاب کو دعوت دیتا ہے۔ جہاد کے سلسلے میں قرآن کریم کی چند آیات کا ترجمہ مندرجہ ذیل ہے:

• اے لوگو جو ایمان لائے ہو، تمہیں کیا ہو گیا کہ جب تم سے اللہ کی راہ میں نکلنے کے لیے کہا گیا تو تم زمین سے چمٹ کر رہ گئے؟ کیا تم نے آخرت کے مقابلہ میں دنیا کی زندگی کو پسند کر لیا؟ ایسا ہے تو تمہیں معلوم ہو کہ دنیوی زندگی کا یہ سب سازوسامان آخرت میں بہت تھوڑا نکلے گا۔ (سورہ توبہ آیت:۳۸)
• اے ایمان والو! کیا میں تمہیں ایسی تجارت بتاؤں جو تمہیں دردناک عذاب سے نجات دے۔ خدا پر اور اس کے رسولﷺ پر ایمان لاؤ اور خدا کی راہ میں اپنے مال اور جان سے جہاد کرو۔ اگر سمجھو تو یہ تمہارے حق میں بہتر ہے۔  اللہ تمہارے گناہ معاف کر دے گا، اور تم کو ایسے باغوں میں داخل کرے گا جن کے نیچے نہریں بہتی ہوں گی، اور ابدی قیام کی جنتوں میں بہترین گھر تمہیں عطا فرمائے گا۔ یہ ہے بڑی کامیابی۔  (سورہ صف آیات:۱۰تا ۱۲)
• جو لوگ آخرت (کو خریدتے اور اس) کے بدلے دنیا کی زندگی کو بیچنا چاہتے ہیں، اُن کو چاہیے کہ خدا کی راہ میں جنگ کریں اور جو شخص خدا کی راہ میں جنگ کرے اور شہید ہوجائے یا غلبہ پائے ، ہم عنقریب اس کو بڑا ثواب دیں گے۔ (سورہ نساء آیت:۷۴)
• اے لوگو جو ایمان لائے ہو، اللہ کے مددگار بنو، جس طرح عیسیٰ ابن مریمؑ نے حواریوں کو خطاب کر کے کہا تھا: “کون ہے اللہ کی طرف (بلانے) میں میرا مددگار؟” اور حواریوں نے جواب دیا تھا: “ہم ہیں اللہ کے مددگار” اُس وقت بنی اسرائیل کا ایک گروہ ایمان لایا اور دوسرے گروہ نے انکار کیا پھر ہم نے ایمان لانے والوں کی اُن کے دشمنوں کے مقابلے میں تائید کی اور وہی غالب ہو کر رہے۔ (سورہ صف آیت:۱۴)
• اور تم اللہ کی راہ میں اُن لوگوں سے لڑو، جو تم سے لڑتے ہیں، مگر زیادتی نہ کرو کہ اللہ زیادتی کرنے والوں کو پسند نہیں کرتا۔ (سورہ بقرہ آیت:۱۹۰)