: یتیم کے مال کو اس کے حوالے کرنے کا قرآن میں یہ حکم دیا گیا ہے کہ جب یتیم بچے کو اس کا مال اس کے حوالے کرنے کا وقت (عمر) آجائے یعنی وہ بالغ ہو جائے اور سمجھ داری آ جائے تو ان کا مال ان کے سپرد کرنے لگو تو گواہ بنا لیا کرو ۔ اس سے یہ فائدہ ہوگا کہ بعد میں وہ یہ نہ کہہ سکیں گے کہ ہم کو مال واپس نہیں کیا گیا اور جتنا مال دیا گیا اس کا علم بھی گواہوں کے سامنے آ سکے گاجس طریقے سے کسی بھی قسم کی مخالفت یا لڑائی جھگڑے کی نوبت سے بچا جا سکے گا۔

قرآن کریم میں یتیموں کا مال ناحق کھانے پر سخت وعید بیان کی گئی ہے کہ جو یتیم کا مال ناحق طریقے سے کھاتے ہیں، وہ اپنے پیٹ میں آگ بھر رہے ہیں اور عنقریب یہ لوگ جہنم کی بھڑکتی ہوئی آگ میں داخل کیے جائیں گے۔ ایک حدیث میں رسول اللہ صلی اللہ علیہ وسلم نے ارشاد فرمایا کہ: “میں نے معراج کی رات ایسی قوم دیکھی جن کے ہونٹ اونٹوں کے ہونٹوں کی طرح تھے اور ان پر ایسے فرشتے مقرر تھے جو ان کے ہونٹوں کو پکڑے رکھتے ، پھر ان کے منہ میں آگ کے پتھر ڈالتے ۔ میں نے پوچھا یہ کون لوگ ہیں؟ جبرائیل علیہ السلام نے جواب دیا: یہ وہ لوگ ہیں جو یتیموں کا مال کھاتے تھے-“

اللہ تعالی اور حضرت محمد صلی اللہ علیہ وسلم کے سامنے والدین، بہن بھائی، میاں بیوی، کنبہ قبیلہ، مکان دکان، مال و دولت اور اولاد وغیرہ کی کوئی حیثیت نہیں ہونی چاہیے جیسا کہ رسول اللہ صلی اللہ علیہ وسلم کا ارشاد ہے:

 ترجمہ: ” تم میں سے کوئی شخص اس وقت تک کامل ایمان والا نہیں ہو سکتا جب تک اس کو مجھ سے محبت اپنے والد، اپنی اولاد اور تمام لوگوں سےبڑھ کر نہ ہو جائے.”  ( بخاری)