قرآن مجید

قرآن کریم ایسی کتاب ہے جس میں دنیا کے تمام انسانوں کے لیے روحانی اور جسمانی شفا موجود ہے ۔ اس کا پڑھنا ، سننا اور عمل کرنا سب کچھ شفا کا باعث ہے لہٰذا جو انسان بھی اس قرآن کو پڑھے گا ، اللہ تعالی اس کے قرآن کے پڑھنے کے سبب اس کو ہر طرح کی روحانی اور جسمانی شفاءعطا فرمائے گا جیسا کہ قرآن کریم میں ارشاد ہے:

وَنُنَزِّلُ مِنَ الْقُرْآنِ مَا هُوَ شِفَاءٌ وَرَحْمَةٌ

 اور ہم قرآن  میں وہ (تعلیمات ) نازل فرماتے ہیں جو ایمان والوں کے لیے شفا اور رحمت ہے ۔ (سورہ بنی اسرائیل، آیت:۸۲)

قرآن کریم ایک ایسی دلفریب اور دلکش کتاب ہے جو اپنے پڑھنے والے کے دل پر ایک ایسا اثر کرتی ہے کہ پڑھنے والا اس قرآن کی تعلیمات سے متاثر ہوئے بغیر نہیں رہ سکتا کیونکہ اس کا ایک نام نور ہے جو دلوں کو پلٹنے والی، گمراہی سے ہدایت دینے والی، تاریکی سے روشنی کی طرف لانے والی ہے۔ قرآن کریم کی اس تاثیر سے لاتعداد لوگوں کی زندگی بدل جاتی ہے۔