سیدنا حضرت امام حسین رضی اللہ تعالی عنہ

سیدنا حضرت حسین رضی اللہ تعالی عنہ نے اپنے نانا حضرت محمد ﷺسے بے پناہ شفقت و محبت کو سمیٹا۔  حضور صلی اللہ علیہ والہ وسلم کو اپنے نواسے سیدنا حسینؓ سے بہت زیادہ محبت تھی۔ آپﷺ امام حسینؓ کو گود میں اٹھاتے، سینہ مبارک پر کھلاتے، کاندھے پر بٹھاتے اور ہونٹوں پر بوسہ دیتے اور رخسار کو چومتے۔ حضرت محمد ﷺنے
سیدنا حسین رضی اللہ تعالی عنہ کے بے شمار مناقب و فضائل بیان فرمائے ہیں جن میں سے چند فضائل ذکر کیے جا رہے ہیں:

حضرت محمد صلی اللہ علیہ وسلم کو حضرت حسین رضی اللہ تعالی عنہ سے بہت زیادہ محبت تھی جس کا اظہار حضور صلی اللہ علیہ وسلم نے اپنی حدیث میں ان الفاظ میں کیا:  حسین مجھ سے ہیں اور میں حسین سے ہوں ۔ (سنن ترمذی)

حضرت ابوہریرہ رضی اللہ تعالی عنہ سے روایت ہے کہ ایک دن رسول اللہ صلی اللہ علیہ وسلم مسجد میں تشریف لائے اور فرمایا: بچہ کہاں ہے؟ حضرت حسین رضی اللہ تعالی عنہ دوڑتے ہوئے آئے، حضورﷺ کی گود میں بیٹھ گئے اور اپنی انگلیاں آپ ﷺکی داڑھی مبارک میں داخل کر دیں۔ حضورﷺ نے ان کا بوسہ لیا اور پھر فرمایا:  اے اللہ! میں اس سے محبت کرتا ہوں، تُو بھی اس سے محبت فرما اور اس سے بھی محبت فرما جو اس سے محبت کرے ۔ (نور الابصار)

ایک دن سیدنا فاروق اعظم رضی اللہ تعالی عنہ دربار رسالت میں حاضر ہوئے اور دیکھا کہ امام حسینؓ رسول اللہ صلی اللہ علیہ وسلم کے مبارک کاندھوں پر سوار ہیں جس کو دیکھ کر حضرت عمر رضی اللہ تعالی عنہ نے فرمایا:  کتنی عمدہ سواری ہے یہ! یہ سن کر اللہ کے رسول صلی اللہ علیہ وسلم نے ارشاد فرمایا:  سوار بھی کتنا عمدہ ہے!