بڑھاپا بچپن کا دور ِ ثانی ہے۔یعنی بڑھاپا درحقیقت انسان کا دوسرا بچپن ہے۔ جس طرح انسان بچپن میں دوسروں کا محتاج ہوتا ہے۔ اسی طرح انسان بڑھاپے میں بھی دوسروں کی مدد کا محتاج بن جاتا ہے۔ بچوں کی طرح بات بات پر ناراض ہوتا ہے اور پھر معمولی سی دلجوئی پر مان جاتے ہیں اور ناراضگی ختم ہوجاتی ہے۔بوڑھی کاکی بڑھاپے میں بچوں کی طرح بات بات پر ناراض ہوتی تھی اور زور زور سے روتی تھی۔اُن کے شوہر کو فوت ہوئے عرصہ گزر چکا تھا اور سات جوان بیٹے بھی ایک ایک کر کہ فوت ہو گئے تھے۔ اس دینا میں ایک بھتیجے بُدھ رام کے سِوا اُس کا اور کوئی نہ رہا تھا۔ بوڑھی کاکی نے اپنی ساری جائیداد بدھ رام کے نام لکھوادی تھی۔ بُدھ رام نے جائیداد نام لکھواتے وقت تو بڑے وعدے کیے تھے، لیکن اُس کے بعد ایک وعدہ بھی پورا نہ کیا۔ جائیداد کی آمدنی پر وہ بیوی بچوں کے ساتھ عیش و عشرت کی زندگی گزار رہا تھا۔ بدھ رام کی بیوی رُوپا طبیعت کی بہت تیز تھی۔اُس کا رویّہ بوڑھی کاکی کے ساتھ بہت بُرا تھا۔ ساری گھر میں صرف بدھ رام کی بیٹی لاڈلی تھی، جو بوڑھی کاکی کا خیال رکھتی تھی۔ 

ایک دن بُدھ رام کے بیٹے سُکھ رام کا رسمِ تِلک تھا۔ گھر میں مہمان آئے ہوئے تھے اور طرح طرح کے پکوان پک رہے تھے۔ تازے پکوان کی خوشبو پورے گھر میں پھیلے ہوئی تھی۔بوڑھی کاکی اپنی کوٹھڑی میں بیٹھی تھی۔ کھانے کی خوشبو اس کو بے تاب کر رہی تھی۔ اس کا دل چاہ رہا تھا کہ گرما گرم پوریوں کے کڑاہ کے پاس وہ جا کر بیٹھ جائے۔ وہ بہ مشکل زمین پر گھسٹتی ہوئی کڑاہ کے پاس آکر بیٹھ گئی۔ روپااپنے کام کاج اور مہمانوں کی تواضع میں لگی تھی۔ جوں ہی بوڑھی کاکی پر نظر پڑی۔آپے سے باہر ہو گئی۔ پھر نہ مہمانوں کی موجودگی کا خیال کیا اور نہ کاکی کی عمر کا لحاظ کیا اور جلی کٹی سُنا دی۔بوڑھی کاکی روتی ہوئی اپنی کوٹھڑی میں واپس چلی گئی۔ مہمان کھانا کر چلے گئے۔ گھر والوں نے بھی کھانا کھا لیا۔ رات ہوگئی۔ لیک کسی کو بوڑھی کاکی کا خیال نہ رہا۔ البتہ لاڈلی نے اپنی پوریاں گُڑیوں کی پٹاری میں چھُپا کر رکھ دی تھیں۔ جب سب لوگ سو گئے تو لاڈلی پوریاں لے کر بوڑھی کاکی کے پاس چلی گئی۔ کاکی نے پوریاں کھا لیں۔ لیکن اُس کی بھوک نہ مٹ سکی۔ لاڈلی سے کہا، مجھے اُس جگہ لے چلو،جہاں مہمانوں نے بیٹھ کر کھانا کھایا تھا۔ شاید وہاں کچھ ٹکڑے پڑے ہوں۔ میں وہ ٹکڑے کھا لوں گی۔ لاڈلی بوڑھی کاکی کو اُس چٹائی پر لے آئی۔ 

بوڑھی کاکی ٹکڑے چُن چُن کر کھا رہی تھی کہ رُوپاکی آنکھ کھلی۔کاکی کو ٹکڑے چُنتے دیکھ کر اُس کو بہت افسوس ہواکہ جس کی جائیداد پر ہم عیش کر رہے ہیں،وہ ٹکڑے چُن کر کھانے پر مجبور ہے۔ رُوپا نے کاکی سے معافی مانگی۔کہا پرماتما سے دعا کرو کہ میری خطا معاف کر دے۔پھر وہ اندر گئی اور ایک تھال میں کھانا سجا کر کاکی کو لا کر دیدیا۔